Ўзбекистон таэквондо терма жамоаси мураббийи Александр Ким Тошкентдаги йиғин ва бўлажак режалар ҳақида Ўзбекистон таэквондо ассоциацияси матбуот хизматига интервью берди.
– Александр Анатольевич, дастлаб Тошкентдаги йиғин ҳақида маълумот берсангиз…
– 4 апрелдан Тошкентда навбатдаги йиғинни бошладик. Барча спортчилар соғ-саломат ва машғулотларда қатнашишмоқда. 15 апрелдан ушбу йиғин халқаро йиғин мақомини олиши кутилмоқда.
– Қандай қилиб?
– Сабаби Тошкентга Грузия ва Хитой Тайпеи таэквондо терма жамоалари келиши режалаштирилган. Агар келишув амалга ошса, Тошкентда учта терма жамоа бирга халқаро ўқув-машғулот йиғинини ўтказади.
– Мазкур йиғинда айнан қандай машғулотларга урғу берилмоқда?
– Бу йиғинда спортчиларимизнинг жисмоний ҳолатини ушлаб туриш мақсадида умумжисмоний тайёргарлик ва махсус жисмоний тайёргарликка урғу бермоқдамиз. Яқинда бўлиб ўтган халқаро мусобақада қатнашган таэквондочиларнинг камчиликларини бартараф этиш ишлари олиб борилмоқда.
– Таэквондочиларимиз олдида турган навбатдаги мусобақалар қайси?
– Терма жамоамиз июнь ойида учта халқаро мусобақада иштирок этиши кутилмоқда. Гран При 1-сериясида Олимпия рейтингидаги энг кучли 32 нафар спортчи иштирок этади. Ушбу мусобақа 3-5 июнь кунлари Италиянинг Рим шаҳрида бўлиб ўтади. 27 июнь куни Хитойда Бутунжаҳон Универсиада баҳслари бошланади. 24-27 июнь кунлари Жанубий Кореяда таэквондо бўйича Осиё чемпионати ўтказилади.
🥋🇺🇿 Ўзбекистон таэквондо WT ассоциацияси матбуот хизмати
