Тошкентда давом этаётган қиличбозлик бўйича Осиё-Океания лицензион мусобақасининг иккинчи куни муваффақиятли бошланди. Бироз аввал ҳамюртимиз Зайнаб Дайибекова мусобақада ғалаба қозониб, Токио-2020 Олимпиадаси йўлланмасини қўлга киритди.
Спортчимиз саралаш давомида Таиланд, Гонг Конг вакилларини мусобақадан чиқариб юборди. Олтин медаль ва Олимпиада йўлланмаси учун кечган беллашувда қозоғистонлик Айгерим Сарибайдан 15:6 ҳисобида устун келди.
Шу тариқа, қиличбозларимизнинг Токио-2020 Олимпия ўйинларига қўлга киритган йўлланмалари сони 3 тага етди. Қайд этиш жоиз, ушбу спорт турида делегациямиз илгари уч Олимпиадада биттадан йўлланма олган холос. Дайибекова саблячи қизларимиз орасида Олимпиада иштирокчисига айланган илк қиличбозимиз сифатида тарихга кирмоқда.
