Сўнгги бир неча кун фигурали учиш мухлислари учун бир олам қувонч улашмоқда. Ниҳоясига етган мамлакат чемпионатидан сўнг навбат юлдузлар иштирокидаги кўргазмали дастурга келди.
Бугун МОҚ раиси Рустам Шоабдураҳмонов мазкур тадбирдан аввал фигурали учиш бўйича россиялик таниқли мураббий Этери Тутребидзе билан учрашди. Бугун “Ҳумо арена”да бўлиб ўтадиган юлдузлар дастурида ушбу мутахассиснинг таниқли шогирдлари ўз маҳоратларини намойиш этишади. Учрашувда Қўмита раисининг биринчи ўринбосари Равшан Ирматов ва Бош котиб Ойбек Касимов, Ўзбекистон қишки спорт турлари ассоциацияси раиси Искандер Шадиев иштирок этишди.
Этери Тутребидзе фигурали учишнинг яккалик йўналишида таниқли мураббий ҳисобланади. Фаолияти давомида икки карра жаҳон чемпиони, Олимпия ўйинлари кумуш медали соҳиби Евгения Медведева, Олимпия ўйинлари чемпионлари Юлия Липницкая, Алина Загитова жаҳон чемпиони Анна Шербакова каби машҳур спортчиларни тарбиялаган.
Учрашувда Тошкентга ташриф буюрган мазкур юлдузларнинг баъзилари ҳам иштирок этишди. МОҚ раиси меҳмонларнинг юртимизда оммавий спорт тарғиботи, хусусан, қишки спорт турлари ривожига қўшаётган ҳиссаси учун ташаккур айтиб, эсдалик совғаларини топширди.
