Халқаро қиличбозлик федерацияси Токио-2020 Олимпия ўйинларига йўлланма берувчи рейтинг жадвалини эълон қилди. Қувонарлиси, рейтинг орқали йўлланма олган спортчиларимиз орасида ҳамюртимиз Малика Ҳакимова ҳам Олимпиада иштирокчилари қаторида эътироф этилди.
Жаҳон рейтингида 76-поғонада турган ҳамюртимиз Осиё қитъаси вакиллари орасида яккалик йўналишида йўлланма олган спортчига айланди. Таъкидлаш жоиз, Ҳакимова Олимпиада цикли давомида Жаҳон кубоги, Осиё ва жаҳон чемпионатлари каби йирик мусобақаларда мунтазам иштирок этиб, керакли рейтинг балларини жамғариб борди.
Регламентга кўра, даставвал лицензиялар жамоавий тартибда тақсимланади. Мусобақаларда энг яхши натижа кўрсатган 8 саккиз жамоа саралаб олинади. Ушбу 8 жамоанинг рейтингдаги энг яхши 3 нафардан спортчилари лицензиат сифатида автоматик тарзда ҳисобдан чиқарилади. Ўша 8 жамоанинг 4 ва ундан кейинги рақамли спортчилари рейтингда қайси ҳолатда туришидан қатъий назар лицензиясиз қолишади. Шундан сўнг ҳар бир минтақаларга маълум квоталар ажратилади. Бу борада Европа ва Осиё-Океания минтақалари 2 тадан, қолган ҳудудлар эса 1 ўринга эга бўлади. Малика Ҳакимова ушбу тизим бўйича Осиё-Океания минтақасининг иккинчи вакили сифатида йўлланмага эга бўлган. Эслатиб ўтамиз, шундан сўнг ҳар бир минтақада лицензион турнирлар ўтказилади ва унда фақат биринчи ўринни эгаллаган спортчилар ҳам Олимпиадага йўлланма олишади.
Шу тариқа, Малика Ҳакимова аёл қиличбозларимиз орасида жаҳон рейтинги орқали Олимпия ўйинларига йўлланма олган илк спортчимизга айланди. Илгари қиличбозларимиз орасида 3 нафари Олимпиадада иштирок этган. Бунгача рапирачимиз Рафкат Рўзиев Атланта-1996 Олимпиадасида, шпагачиларимиз Аниса Петрова Синдей-2000, Руслан Кудаев эса Лондон-2012 Олимпиадаларида иштирок этишган. Умид қиламизки, апрель ойида пойтахтимизда ўтадиган лицензион мусобақа якунида бундай спортчиларимиз сони янада ортажак.
Маълумот учун, Малика Ҳакимова 1996 йил 24 январь куни Навоий шаҳрида туғилган. 10 ёшидан қиличбозлик билан шуғулланиб келади. 2012 йилда пойтахтимиздаги Олимпия захиралари коллежига келган Малика қисқа вақт ичида катта ўсишга эришди. 2013 йил ўсмирлар ўртасида, 2014 йил эса ёшлар ўртасида Осиё чемпионатида ғалаба қозонди. Катталар ўртасида эса Жаҳон кубоги совриндори ҳисобланади. Мураббийи – Руслан Кудаев.
Ўзбекистон Миллий олимпия қўмитаси ушбу муваффақият билан Малика Ҳакимова ва унинг яқинларини, Ўзбекистон қиличбозлик федерацияси ва қиличбозлик спорти оиласини самимий муборакбод этади.
