Хабарингиз бор, 3 апрель куни пойтахтимиздаги муҳташам “Ҳумо арена” муз саройида катта профессионал бокс кечаси ташкил қилинади. Юртимизда илк бор ўтказиладиган ушбу бокс оқшомининг марказий жангида ҳамюртимиз Муроджон Аҳмадалиев япониялик Рёсукэ Ивасага қарши WBA ва IBF камарларини ҳимоя қилади.
Кеча тунда ушбу кечанинг юлдузлари Тошкентга етиб келишди. Дастлаб япониялик Рёсукэ Иваса, шундан сўнг Муроджон Аҳмадалиев, Шаҳрам Ғиёсов, Исроил Мадримов ва уларнинг профессионал боксдаги мураббийлари, улар билан фаолият олиб бораётган промоутерлик компанияси вакиллари ҳам пойтахтимизга ташриф буюришди.
Тантанали кутиб олиш маросимида МОҚ раиси ўринбосари, Ўзбекистон бокс федерацияси раисининг биринчи ўринбосари Сакен Полатов, Ўзбекистон бокс федерацияси мутасаддилари ва ташкилий қўмита вакиллари, ОАВ ходимлари иштирок этишди.
Маълумот учун, 1 апрель куни жанглар олдидан боксчилар иштирокида матбуот анжумани ўтказилса, 2 апрель санасида кечанинг юлдузлари вазн ўлчаш маросимида иштирок этишади. Жанглар эса 3 апрель куни соат 17:30 да бошланади.
