Yangiliklar

Бешариқда “ИИБ кубоги” ғолиби аниқланди, энди навбат “Прокурор кубоги”га

By 14.01.2021 No Comments

Фарғона вилояти Бешариқ туманидаги маҳаллалар жамоалари ўртасида ўтказиб келинаётган сектор раҳбарлари кубоги учун мини-футбол мусобақаларининг навбатдагиси ўз якунига етди.

14 январь – Ватан ҳимоячилари куни байрамида «ИИБ кубоги» турнири ғолиби аниқланди. Турнирнинг финал босқичида тўртта жамоа ўзаро куч синашди. 3-ўрин учун кечган баҳсда “Товул” МФЙнинг “Қатортол” жамоаси “Пастки Яккатут” МФЙ жамоаси билан асосий вақтда дуранг ўйнади – 2:2. Пенальтилар сериясида эса омад “Товул” маҳалласи жамоасига кулиб боқди.

Мусобақанинг финал баҳсида Абдураззоқ ота ҳамда “Тошариқ” маҳаллалари жамоалари тўқнаш келишди. Муросасиз ўтган баҳсда Абдураззоқ ота маҳалласи жамоаси 4:2 ҳисобида ғалаба қозониб, «ИИБ кубоги» соҳибига айланди. Ғолибларга туман ҳокими ҳамда ИИБ бошлиғининг эсдалик совғалари топширилди.

Финал учрашувини 3 мингдан ошиқ томошабин кузатиб борди. Маданият марказининг ёш хонандалари ижросидаги куй-қўшиқлар эса байрам тадбирларига ўзгача файз киритди.

Шундан сўнг мини-футбол мусобақалари эстафетасини туман прокуратураси қабул қилиб олди. Демак, навбатдаги турнир «Прокурор кубоги» учун ўтказилади.

Жисмоний тарбия ва спорт вазирлиги

Матбуот хизмати